Dünyanın hər işi belədir, inan,

Hər kəs razı qalmaz – bu mümkün deyil.

Özün ol, özün tək yaşa hər zaman,

Həyat səninkidir, özgənin deyil!

Qoy səsin yayılsın, qoy eşidilsin,

Hər qanad çırpıntın bir hünərindir.

Ruhun öz yolunu qoy özü bilsin,

Bu ömür sınaqdır, bu can sənindir.

Səni bilməyənlər nə deyir desin,

Ruhun qanadıyla göylərə ucal.

Bu fani dünyadan köç edən zaman,

Yalnız özün olub, özün kimi qal!

Daşlardan hörülüb hər bir xatirə,

Yıxılsan, o daşlar dayağın olar.

Baş əymə kədərə, enmə namərdə

Səbrin qaranlıqda çırağın olar.

Kimi kölgə gəzər, kimi iz qoyar,

Sən iz qoyanlardan olmağı seçdin.

Ruhun bu həyatdan nə vaxtsa doyar,

Amma sən dürüstlük andını içdin.

Nə bir alqış gözlə, nə də mərhəmət,

Özünə sadiq qal – bu bəsdir sənə.

Ən böyük zəfərdir daxili vəhdət,

Allah pıçıldasın: “Eşq olsun sənə!”