Şərifə Cəfəri 1977-ci ildə Cənubi Azərbaycanın Şərqi Azərbaycan vilayətinin Miyanə şəhərində anadan olmuşdur. Uşaqlıq illərindən ədəbiyyata və mədəni fəaliyyətə böyük maraq göstərmiş, ibtidai məktəb illərində müxtəlif müsabiqələrdə uğur qazanaraq birinci yerlərə layiq görülmüşdür. Orta məktəb illərindən etibarən fars və Azərbaycan türkcəsində qələmə aldığı şeirləri və məqalələri yerli və regional mətbuat orqanlarında dərc olunmağa başlamışdır.
Ali təhsilini Zəncan Universitetinin Fars dili və ədəbiyyatı fakültəsində almışdır. Tələbəlik illərində elmi və ədəbi fəaliyyətini daha da genişləndirərək şəhərin ədəbi məclislərinin və tələbə birliklərinin fəal üzvünə çevrilmiş, universitetdə şeir bölməsinin əsasını qoymuşdur. Eyni zamanda tələbə yataqxanalarının mədəniyyət direktoru seçilmiş, təhsilini davam etdirərkən öz yaşayış xərclərini də zəhməti ilə təmin etmişdir.
Universiteti bitirdiyi ildə Zəncan Radio və Televiziyasının İşraq televiziyası tərəfindən radio və televiziya proqramlarının hazırlanmasına dəvət olunmuşdur. Onun təşəbbüsü ilə hazırlanan "Yaşıl Yarpaq" adlı ədəbi proqramın baş redaktoru və rəhbəri olmuşdur. Qısa müddətdə geniş tamaşaçı rəğbəti qazanan bu proqram xüsusilə Azərbaycan türkcəsində yayımlandığı üçün böyük maraq doğurmuş, lakin məhz bu səbəbdən siyasi təzyiqlərlə üzləşmiş, proqram dayandırılmış və hazırlanmış bütün buraxılışlar arxivdən silinmişdir.
Həmin ildə müəllifin ilk şeirlər kitabı – "Mən Atamın Qızıyam" işıq üzü görmüşdür. Radio və televiziyadan uzaqlaşdırıldıqdan sonra nəşriyyat fəaliyyəti ilə məşğul olmaq üçün rəsmi lisenziya almış və şeir, ədəbiyyat kitablarının nəşrinə başlamışdır. Qısa müddətdə ölkənin ən fəal nəşriyyatlarından birini yaratmış, ardıcıl olaraq çoxsaylı kitablar çap etdirmişdir. Lakin Azərbaycan türkcəsində kitabların nəşri ilə bağlı siyasi təzyiqlər nəticəsində Zəncanı tərk edərək Kərəcə köçmək məcburiyyətində qalmışdır.
Kərəcdə fəaliyyətini davam etdirən Şərifə Cəfəri xalqın kitaba marağını artırmaq və milli-mədəni dəyərləri yaşatmaq məqsədilə meydan və parklarda kitab sərgiləri təşkil etmiş, farsdilli nəşrlərlə yanaşı Azərbaycan türkcəsində kitabları da oxuculara təqdim etmişdir. O, Kərəcdə Azərbaycan türkcəsində kitabları geniş şəkildə təqdim edən ilk nəşriyyatçılardan biri kimi tanınmışdır. Lakin təhlükəsizlik orqanlarının davamlı təzyiqləri nəticəsində təşkil etdiyi sərgilərin böyük hissəsi bağlanmış, maddi və mənəvi zərərlərlə üzləşmişdir. Sonradan nəşriyyatını Tehrana köçürmüş və fəaliyyətini burada davam etdirmişdir.
Tehranda da uğurlu nəşriyyat fəaliyyəti göstərsə də, siyasi təzyiqlər daha da artmışdır. Onun Tehran Beynəlxalq Kitab Sərgisində iştirakına qadağa qoyulmuş, təsis etdiyi Pınar Nəşriyyatının lisenziyası ləğv edilmişdir. Şərifə Cəfəri heç bir hüquqi əsas olmadan "pantürkizm" və "Azərbaycan casusluğu" kimi ittihamlarla məhkəməyə çağırılmışdır. Halbuki onun Azərbaycan Respublikası və ya hər hansı dövlət qurumu ilə heç bir əlaqəsi olmamışdır. Bu təzyiqlərin əsas məqsədi onun ana dilində nəşriyyat və mədəni fəaliyyətinin qarşısını almaq idi.
Davamlı təqiblər nəticəsində Şərifə Cəfəri doğma vətənini tərk etmək məcburiyyətində qalmış, qızı ilə birlikdə əvvəlcə Türkiyəyə, daha sonra isə Almaniyaya mühacirət etmişdir. Bu səbəbdən magistratura təhsilini də yarımçıq qoymuşdur.
Müəllifin indiyədək üç şeir kitabı nəşr olunmuşdur: "Mən Atamın Qızıyam", "Gizli Aşk" (Azərbaycan türkcəsində şeirlər) və "Ürəyim Uçmaq İstəyir" (fars dilində şeirlər). Onun əsərləri Azərbaycan, İran və İraqda nəşr olunan müxtəlif antologiyalarda yer almışdır. Bundan başqa, İran, Türkiyə və Azərbaycandan olan müasir şairlərin əsərlərini fars dilinə tərcümə edərək ədəbi-mədəni əlaqələrin inkişafına töhfə vermişdir.
Almaniyada yaşadığı dövrdə də milli-mədəni fəaliyyətini davam etdirən Şərifə Cəfəri Azərbaycan İnsan Haqları Dərnəyi ilə əməkdaşlıq etmiş, dəfələrlə BMT-nin Cenevrədə keçirilən iclaslarında iştirak edərək Cənubi Azərbaycanda yaşayan soydaşlarının hüquqlarının müdafiəsi istiqamətində çıxışlar etmişdir. O, Berlində "İşıq Yol" Azərbaycan Mədəniyyət və Ədəbiyyat Dərnəyini təsis etmişdir. Hazırda dərnəyin rəhbəri kimi Azərbaycan dili, ədəbiyyatı və milli-mədəni irsin qorunması, yaşadılması və gələcək nəsillərə ötürülməsi istiqamətində fəaliyyətini davam etdirir.
Bu bioqrafiya Şərifə Cəfərinin həyat yolu, ədəbi yaradıcılığı və milli-mədəni mübarizəsini əks etdirən kitab üçün hazırlanmışdır.

O axı sözlərə sığacaq qədər,
Bir şəkil deyil ki, bir iz deyil ki...
Mən onu şeirə necə sığdırım?
O dümdüz məna dır, o söz deyil ki!

Mən necə sığdırım gül yarpağına
Bir dünya kəlməni, bir dünya sözü?
Təsvirə çəkilmir axı mən sevən,
Can alan gülüşü, mehriban üzü.

İllərdir gəzdiyim nəğmədir onun,
Zilində, bəminində var olur heçim.
Tufanlı dənizin dalğası kimi
Çırpınır ürəyim, qıvrılır içim.

Elə verilmişəm dünyasına ki,
Ruhumu özümdə tuta bilmərəm.
Dünyalar qarşımda dursalar belə,
Onu öz dünyamdan ata bilmərəm.

Şərifə Cəfəri